28-nji oktýabrda Türkmenistanyň Jemgyýetçilik guramalarynyň merkezi binasynda Gurluşyk we senagat toplumynyň işgärleriniň güni mynasybetli Türkmenistanyň Kärdeşler arkalaşyklarynyň Milli merkeziniň Gurluşyk we senagat işgärleriniň, Türkmenistanyň Energetika işgärleriniň hem-de Türkmenistanyň Awtoulag we ýol hojalyk işgärleriniň kärdeşler arkalaşygynyň Geňeşleriniň bilelikde gurnamaklarynda «Gurluşyk we senagat toplumynyň batly gadamlary» atly aýdym-sazly dabaraly maslahat geçirildi. Dabaraly maslahaty Türkmenistanyň Senagat we gurluşyk önümçiligi ministrliginiň «Türkmendemirönümleri» döwlet kärhanasynyň Tehniki-konstruktor býurosynyň inžener-mehanigi N.Seýitmyradow alyp bardy. Dabaranyň dowamynda Türkmenistanyň Gurluşyk we binagärlik ministrliginiň «Türkmenistanyň gurluşygy we binagärligi» žurnalynyň bölüm redaktory A.Şagulyýew, Türkmenistanyň Energetika ministrliginiň işgärleriniň kärdeşler arkalaşygynyň Geňeşiniň esasy hünärmeni A.Pirnazarowa, Türkmenistanyň Gurluşyk we binagärlik ministrliginiň Ylmy-tehniki innowasiýalar müdirliginiň baş hünärmeni M.Allaberenow, «Türkmenelektrosazlaýyş» ýöriteleşdirilen kärhanasynyň hünärmeni O.Annamämmedowa we Türkmenistanyň Awtoulag we ýol hojalyk işgärleriniň kärdeşler arkalaşygynyň Geňeşiniň tehniki gözegçisi A.Öwezowdagylar çykyş etdiler. Dabaraly maslahat Türkmenistanyň Telewideniýe, radiogepleşikler we kinematografiýa baradaky döwlet komitetiniň «Altyn Asyr: Türkmenistan» teleradioýaýlymy tarapyndan ýazgy edildi.
Dabaranyň dowamynda çykyş edenler Berkarar döwletiň täze eýýamynyň Galkynyşy döwründe türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň ýurdumyzy hemmetaraplaýyn esasda ösdürmek boýunça başyny başlan taryhy özgertmeleriniň, hormatly Prezidentimiz Arkadagly Gahryman Serdarymyzyň parasatly ýolbaşçylygynda döwrüň ruhuna laýyk derejede has-da rowaçlanýandygyny, baky Bitarap Watanymyzyň halkara abraý derejesiniň has-da pugtalanýandygyny, mähriban halkymyzyň abadan we bagtyýar durmuşda ýaşamagy ugrunda ägirt uly tagallalaryň edilýändigini bellediler hem-de ähli ulgamlar bilen hatarda ýurdumyzyň Gurluşyk we senagat toplumynda gazanylýan üstünlikler, ýetilen belent sepgitler dogrusynda buýsançly gürrüňler etdiler.
Dabaranyň dowamynda Türkmenistanyň Energetika ministrliginiň «Serpaý» folklor-etnografiýa toparynyň aýdymçy-sazandalarynyň ýerine ýetiren çykyşlaryna giň orun berildi. Olaryň ýerine ýetiren ajaýyp aýdym-sazlarynda türkmen halkynyň Milli Lideri Gahryman Arkadagymyzyň taýsyz tagallalary, hormatly Prezidentimiz Arkadagly Gahryman Serdarymyzyň parasatly ýolbaşçylygynda Garaşsyz, baky Bitarap Watanymyzda gazanylýan üstünlikler, bagtyýar zamanamyz hem-de mähriban Watanymyz belentden wasp edildi.
Dabarada Türkmenistanyň Gurluşyk we senagat toplumynyň işgärleriniň güni mynasybetli toplumyň öňdebaryjy işgärleri Türkmenistanyň Kärdeşler arkalaşyklarynyň Milli merkeziniň Gurluşyk we senagat işgärleriniň, Türkmenistanyň Energetika işgärleriniň hem-de Türkmenistanyň Awtoulag we ýol hojalyk işgärleriniň kärdeşler arkalaşygynyň Geňeşleriniň adyndan ýadygärlik sowgatlary bilen sylaglanyldy.
Dabaraly maslahatyň ahyrynda oňa gatnaşyjylar ýurdumyzy senagat taýdan has-da kuwwatly döwlete öwürmek ugrunda taýsyz tagallalary edýän, ýurdumyzyň Gurluşyk we senagat toplumynyň agzybir işgärleri üçin zähmet çekmäge giň mümkinçilikleri döredip berýän türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň adyna alkyş sözlerini beýan etdiler.
ŞEMŞAT ÖWEZMURADOWA
Türkmenistanyň Senagat we gurluşyk önümçiligi ministrliginiň
«Türkmendemirönümleri» döwlet kärhanasynyň Administratiw-hojalyk gullugynyň iş ýöredijisi,
Kärdeşler arkalaşygynyň ilkinji guramasynyň işjeň agzasy