16-njy oktýabrda Türkmenistanyň Senagat we gurluşyk önümçiligi ministrliginiň «Türkmendemirönümleri» döwlet kärhanasynyň Mejlisler jaýynda «Türkmendemirönümleri» döwlet kärhanasynyň, Türkmenistanyň Kärdeşler arkalaşyklarynyň Gökdepe etrabynyň Kärdeşler arkalaşyklarynyň birleşiginiň hem-de Türkmenistanyň Magtymguly adyndaky Ýaşlar guramasynyň Ahal welaýatynyň Gökdepe etrap Geňeşiniň guramagynda hormatly Prezidentimiz Arkadagly Gahryman Serdarymyza «Türkmenistanyň at gazanan arhitektory» diýen hormatly adyň dakylmagyna bagyşlanan wagyz-nesihat duşuşygy geçirildi. Wagyz-nesihat duşuşygyny «Türkmendemirönümleri» döwlet kärhanasynyň Önümçilik-tehniki we tehnologiki bölüminiň başlygy-baş tehnolog O.Annadurdyýew alyp bardy.

         Wagyz-nesihat duşuşygynyň dowamynda «Türkmendemirönümleri» döwlet kärhanasynyň direktory A.Döwletow, Türkmenistanyň Kärdeşler arkalaşyklarynyň Gökdepe etrabynyň Kärdeşler arkalaşyklarynyň birleşiginiň başlygy B.Ataýew, Türkmenistanyň Magtymguly adyndaky Ýaşlar guramasynyň Ahal welaýatynyň Gökdepe etrap Geňeşiniň başlygy B.Babaýew, «Türkmendemirönümleri» döwlet kärhanasynyň Gurluşyk-abatlaýyş meýdançasynyň başlygy B.Rejepowdagylar çykyş etdiler.

             Çykyşlarda, Berkarar döwletiň täze eýýamynyň Galkynyşy döwründe Halkara parahatçylyk we ynanyşmak ýylynda hormatly Prezidentimiz Arkadagly Gahryman Serdarymyzyň taýsyz tagallalary bilen halkymyzyň abadan we bagtyýar durmuşda ýaşamagy ugrunda ägirt uly işler amala aşyrylýandygyny, gazanylýan beýik üstünlikler, ýetilýän belent sepgitler türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň ady bilen berk baglanşyklydygyny belläp, 2025-nji ýylyň 8-nji oktýabrynda Türkmenistanyň Mejlisiniň karary bilen, hormatly Prezidentimiz Arkadagly Gahryman Serdarymyza Türkmenistanda gurulýan saglygy goraýyş edaralarynyň binagärlik babat-da ýokary ölçeglere, milli äheňlere laýyk bolmagyny üpjün etmekde, şäher gurluşyk işini ýokary derejelere ýetirmekde, saglygy goraýyş edaralarynyň binagärlik-gurluşyk taslamalary işlenip düzülende dünýäde gazanylan oňyn tejribeleri, innowasion tehnologiýalary, öňde baryjy inženerçilik, binagärlik, bezeg işläp taýýarlamalaryny işjeň ulanmakda, taslama we binagärlik işleri boýunça ýokary derejeli hünärmenleri taýýarlamakda, ýaşlary bu işlere çekmekde, ylmy oý-pikiriň we tehniki ösüşiň gazananlaryny peýdalanmakda alyp barýan ägirt uly işlerini, şeýle hem saglygy goraýyş babatda jemgyýetiň we döwletiň öňünde bitiren aýratyn hyzmatlaryny göz öňünde tutup, halk wekillerinden, ýurdumyzyň iri jemgyýetçilik birleşiklerinden, zähmet toparlaryndan, raýatlarymyzdan gelip gowşan teklipleriň esasynda, Saglygy goraýyş we derman senagaty işgärleriniň güni mynasybetli, Türkmenistanyň Konstitusiýasynyň 81-nji maddasyna laýyklykda «Türkmenistanyň at gazanan arhitektory» diýen hormatly adyň dakylmagynyň şanly ýylymyzyň taryhy wakalarynyň biri bolup, tutuş halkymyzda buýsanç duýgularyny goşalandyrandygyny bellediler.

         Binýady berkden tutulan Garaşsyz Watanymyzda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň asylly başlangyçlary ýurdumyzda mynasyp derejede dowam etdirilýär. Ýurdumyzda binagärligi ösdürmekde, häzirki zaman has oňaýly ýaşaýyş jaýlaryny bina etmekde, raýat, saglygy goraýyş, senagat we oba binagärlik toplumlaryny döretmekde hormatly Prezidentimiziň bitiren we häzirki döwürde alyp barýan işleri dünýä nusgalykdyr. Şunda Gahryman Arkadagymyzyň başlangyjy bilen hut özüniň ýolbaşçylygynda işlenilip taýýarlanylan «Saglyk» Döwlet maksatnamasy esasynda saglygy goraýyş ulgamyny ösdürmekde we onuň işini netijeli utgaşdyrmakda möhüm Döwlet maksatnamasynyň çäklerinde saglygy goraýyş ulgamynda bimöçber işleriň alnyp barylýandygyny aýratyn bellemek gerek. Paýtagtymyz Aşgabatda, sebitde ilkinji «akylly» şäher konsepsiýasy esasynda bina edilen döwrebap Arkadag şäherinde we welaýatlarymyzda saglygy goraýyşy halkara ölçeglerine laýyk derejede ösdürmek, pudaga innowasion tehnologiýalary, öňdebaryjy lukmançylyk tejribelerini ornaşdyrmak bilen bir hatarda, binagärlik keşbi bilen tapawutlanýan nusgalyk saglygy goraýyş we bejeriş edaralaryny gurmak işlerine hem aýratyn üns berilýär. Muňa mysal edip, Aşgabat şäherinde Halkara fiziologiýa ylmy-kliniki merkezini we Halkara sagaldyş-dikeldiş merkezini, Arkadag şäherinde Enäniň we çaganyň saglygyny goraýyş merkezini we köpugurly hassahanany, Balkan welaýatynda iki sany köpugurly hassahanany, Daşoguz welaýatynyň Daşoguz şäherinde köpugurly hassahanany we onkologiýa hassahanasyny hem-de başga-da köp sanly saglygy goraýyş edaralaryny görkezmek bolar. Häzirki wagtda gurluşygy ýokary depginlerde alnyp barylýan Aşgabatdaky Halkara pediatriýa, Halkara onkologiýa ylmy-kliniki merkezleriniň, «Arçman» şypahanasynda goşmaça binalar toplumy, şeýle hem Aşgabat şäherinde köpugurly hassahananyň, Ahal welaýatynyň Tejen şäherinde etrabara köpugurly hassahananyň, Daşoguz welaýatynyň Daşoguz şäherinde Enäniň we çaganyň saglygyny goraýyş merkeziniň gurluşygyna badalga berilmegi milli saglygy goraýyş ulgamynyň maddy-enjamlaýyn binýadynyň üstüni ýetirmek bilen, binagärlik babatda ýokary ölçegleriň üpjün edilmegi hem-de milli binagärlik äheňlerine we nusgalaryna laýyk getirilmegi netijesinde, bu binalar paýtagtymyzyň we gurulýan ýerine ajaýyp gözellik paýlar.

             Arkadagly Gahryman Serdarymyzyň parasatly ýolbaşçylygynda ýurdumyzda gurluşygy alnyp barylýan dürli maksatly binalaryň gurluşyk işlerinde bu ugurda dünýäde gazanylan oňyn tejribeler, innowasion tehnologiýalar, öňdebaryjy inženerçilik çözgütleri, binagärlik, bezeg we beýleki zerur bolan ugurlara aýratyn üns berilýär. Türkmenistanyň mukaddes Garaşsyzlygynyň 34 ýyllyk baýramynyň baýram edilýän toýly günlerinde Merjen paýtagtymyz Aşgabat şäherinde we Arkadag şäherinde, şeýle hem welaýatlarymyzda açylyp ulanylmaga berilen köpsanly desgalar munuň aýdyň subutnmasy bolmak bilen, hormatly Prezidentimiziň ýolbaşçylygynda geljekki nesillere baky miras galjak, döwrebap, täsin inženerçilik çözgütlerini özünde jemleýän, dürli maksatly kaşaň binalar, döwrebap obalar we şäherler bagtyýar halkymyzyň isleglerine we bähbitlerine gönükdirilýär.

         Gözbaşyny gadymýetiň gatlaryndan alyp gaýdýan milli türkmen binagärlik sungaty häzirki günlerimizde hormatly Prezidentimiziň ýolbaşçylygynda has-da kämilleşdirilip, gözellik we oňaýlylygyň utgaşmasy bolup bütin dünýä ýaň salýar. Türkmen halkynyň Milli Lideri Gahryman Arkadagymyzyň hem-de hormatly Prezidentimiziň ýolbaşçylygynda Merjen paýtagtymyz Aşgabat şäherinde bina edilen täsin we haýran galdyryjy binalar bagtyýar raýatlarymyzyň göwün guşuny ganatlandyryp, dünýä jahankeşdeleriniň ünsüni özüne çekýär. Paýtagtymyzyň tutuşlugyna we bina edilen birnäçe ajaýyp binalaryň Ginnesiň bütin dünýä rekordlar kitabyna girizilmegi bolsa munuň aýdyň subutnamasydyr.

             Ýurdumyzda hormatly Prezidentimiziň ýolbaşçylygynda taslama we binägärlik işleri boýunça ýokary derejeli hünärmenleri taýýarlamak, ýaşlary bu işlere giňden çekmek, bu ugurda ýaş alymlaryň täze neslini kemala getirmek ýaly ugurlara hem aýartyn üns berilmegi Arkadagly Gahryman Serdarymyzyň öňdengörüjilikli oýlanşykly syýasatynyň aýdyň beýany bolmak bilen, iri möhüm gurluşyk taslamalarynyň aglaba böleginiň ýerli hünärmenlerimiz tarapyndan ýerine ýetirilmegi bolsa bu işleriň barha rowaçlanýandygynyň aýdyň subutnamasydyr.

         Hormatly Prezidentimiziň ýolbaşçylygynda gurluşyk ulgamyny has-da kämilleşdirmek, ulgama sanly ulgamy ornaşdyrmak boýunça giň gerimli işler alnyp barylýar. Bu bolsa milli gurluşyk ulgamynyň işiniň barha rowaçlanmagyna itergi berýär. Munuň netijesinde, häzirki wagtda meýilleşdirilýän gurluşyk desgalarynyň taslamalaryny işläp taýýarlamakda, gurluşygyň düýpli görkezijilerini takyk hasaplamakda, deslapky taslama-çenlik hasaplamalaryny alyp barmakda degişli resminamalary taýýarlamakda, gurluşyk işlerini maliýeleşdirmek we meýilleşdirmek, gerekli maglumatlary iş ýüzünde peýdalanmak ýaly iş amallary dolulygyna diýen ýaly awtomatlaşdyryldy. Bu işleri talabalaýyk alyp barmak boýunça ýörite kompýuter programmalary, elektron binýatlar we serwerler ornaşdyryldy. Netijede bolsa, hormatly Prezidentimiz Arkadagly Gahryman Serdarymyzyň ýolbaşçylygynda, berk binýatly, häzirki zaman, milli we daşary ýurt binagärlik äheňleriniň iň kämil nusgalaryny özünde jemleýän kaşaň binalar gurulýar. Şeýle işleriň yzygiderli tapgyrlaýyn esasda alnyp barylmagy bolsa türkmen halkynyň Milli Lideri Gahryman Arkadagymyzyň «Gurýan döwlet – gurply döwletdir!» diýen ajaýyp jümlesiniň dabaralanmasy bolup, Watanymyzyň ykdysady kuwwatynyň ýokary göterilýändiginiň aýdyň subutnamasyna öwrülýär.

             Wagyz-nesihat duşuşygynyň ahyrynda oňa gatnaşyjylar, eziz diýarymyzy gurmagyň we döretmegiň aýdyň ýoly bilen öňe alyp barýan türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyza hem-de hormatly Prezidentimiz Arkadagly Gahryman Serdarymyza jan saglyk, uzak ömür, alyp barýan döwletli işleriniň rowçlyklara beslenmegini tüýs ýürekden arzuw etdiler.

ORAZBERDI ANNADURDYÝEW
Türkmenistanyň Senagat we gurluşyk önümçiligi ministrliginiň
«Türkmendemirönümleri» döwlet kärhanasynyň
Önümçilik-tehniki we tehnologiki bölüminiň başlygy-baş tehnolog