Siziň Alyhezretiňiz! Ýewropa ahalteke atçylyk assosiasiýasynyň adyndan, şeýle hem hut öz adymdan Niderlandlar Patyşalygynyň “Pilbergen” atçylyk-sport toplumynda ahalteke bedewleriniň dünýä çempionatyny we onuň bilen bagly halkara çäreleri geçirmäge beren goldawyňyz, bu çäreleriň guramaçylyk işlerine ýolbaşçylyk edendigiňiz hem-de olara hut özüňiziň gatnaşandygyňyz üçin Size tüýs ýürekden hoşallygymy beýan etmäge rugsat beriň! Şeýle taryhy ähmiýetli wakanyň ýokary derejede guralmagyna gatnaşmagymyz assosiasiýamyz üçin uly mertebedir. Biz ilkinji gezek Ýewropanyň merkezinde, giň gerimde köp sanly naýbaşy ahalteke atlaryny, olaryň eýelerini, atşynaslary, atçylyk pudagynyň hünärmenlerini, bu ajaýyp bedewleriň muşdaklaryny, dürli ýurtlaryň we bileleşikleriň wekillerini bir ýere jemlemegi başardyk. Bu çempionat diňe bir atşynaslyk bileleşiginde däl, eýsem, giň jemgyýetçilikde hem uly gyzyklanma döredip, tomaşaçylaryň ünsüni özüne çekdi. Çäre tamamlanandan soňra hem biziň adymyza oňa gatnaşyjylardan, myhmanlardan, hünärmenlerden köp sanly hoşallyk hatlarynyň gelip gowuşmagy dowam edýär. Olarda çempionatyň guramaçylygynyň ýokary derejesi, mazmuny we özboluşly häsiýeti uly täsir galdyrdy. Olaryň köpüsi ýatdan çykmajak duýgulary başyndan geçirendiklerini, bu wakalaryň özlerinde uly täsir galdyrandygyny, geljekde ýene-de şeýle çärelere gatnaşmaga sabyrsyzlyk bilen garaşýandyklaryny belleýärler. Siziň parasatly ýolbaşçylygyňyz netijesinde bu ajaýyp üstünligi gazanmak mümkin boldy. Siziň hut özüňiziň bu çärelere gatnaşmagyňyz çempionatyň ähmiýetini has-da artdyrdy hem-de ony adaty atly sport bäsleşikleriniň çäklerinden çykaryp, has ýokary derejä ýetirdi. Bu köpöwüşginli bäsleşik bedewleriň täsin ahalteke tohumyny giňden wagyz etmek hem-de olaryň gözelligi, taryhy, mirasy bilen giň dünýä jemgyýetçiligini has ýakyndan tanyşdyrmak üçin täze mümkinçilikleri açýan halkara meýdança öwrüldi. Atly sport çäreleri ahalteke bedewiniň diňe bir dünýäniň iň gadymy hem-de meşhur at tohumlarynyň biri bolman, eýsem, halklary we medeniýetleri birleşdirýän kuwwatly güýçdügini aýdyň görkezdi. Çäreleriň maksatnamasynyň toplumlaýyn häsiýeti onuň ähmiýetini has-da artdyrdy. Çempionat bilen bir hatarda, halkara maslahatyň hem-de bu ulgamy ösdürmegiň geljegi barada hünärmenleriň, atlary ösdürip ýetişdirýänleriň, atşynaslyk bileleşiginiň wekilleriniň arasynda ahalteke tohumyny gorap saklamak, köpeltmek hem-de halkara giňişlikde ilerletmek babatda pikir alyşmalaryň geçirilmegi toplanan bilimleri, tejribeleri hem-de teklipleri paýlaşmaga mümkinçilik berdi. Şol bir wagtyň özünde, medeni maksatnama myhmanlara Türkmenistany täzeden tanatmak üçin amatly giňişlik bolup hyzmat etdi. Bedewleriň, däp-dessurlaryň, sungatyň, sazyň hem-de myhmansöýerlik ýörelgeleriniň üsti bilen giň tomaşaçylar köpçüligi diňe bir ýurduňyzyň baý medeni mirasyna aralaşmaga däl-de, türkmen halkynyň mährini, belent ruhuny duýmaga-da mümkinçilik aldy. Bu babatda geçirilen dabaralar atşynaslyk ýörelgelerini, ylmy, medeniýeti, halklaryň dostlugyny birleşdirýän özboluşly köprä öwrüldi. Bu möhüm başlangyjy öňe sürendigiňiz we oňa ýolbaşçylyk edendigiňiz, dünýä medeniýetiniň, atşynaslyk mirasynyň örän gymmatly hazynasy hökmünde ahalteke tohumyny gorap saklamak hem-de wagyz etmek işine köp ýyllaryň dowamynda üýtgewsiz ygrarlylygyňyz üçin Siziň Alyhezretiňize aýratyn hoşallygymyzy beýan edýäris. Bu iri halkara atly sport çäreleriniň üstünlikli geçirilmeginiň hyzmatdaşlygyň mundan beýläk-de ösdürilmegine kuwwatly itergi berjekdigine, ahalteke bedewlerini bütin Ýewropada we onuň çäklerinden daşarda wagyz etmegiň täze döwrüniň başlanmagyny alamatlandyrjakdygyna ynanýaryn. Siziň nobatdaky çempionaty her bäş ýyldan geçirmek baradaky başlangyjyňyzy ýokary ruhubelentlik bilen goldaýarys hem-de bilelikdäki tagallalar arkaly bu başlangyjyň üstünlikli amala aşyryljakdygyna ynam bildirýäris. Biziň hyzmatdaşlygymyzyň geljekde-de ösdüriljekdigine we pugtalandyryljakdygyna tüýs ýürekden umyt edýäris. Taryhy ähmiýetli çäreleri üstünlikli geçirmekde öňdengörüjiligiňiz, ýolbaşçylygyňyz hem-de şahsy goşandyňyz üçin Siziň Alyhezretiňize hoşallygymy kabul etmegiňizi haýyş edýärin! Tüýs ýürekden hormatlamak bilen, Marian WELTEWREDEN,Ýewropa ahalteke atçylyk assosiasiýasynyň ýolbaşçysy.

Arkadag şäherinde ýokary derejedäki halkara mejlis geçirildi Arkadag şäheri, 12-nji sentýabr (TDH). Gahryman Arkadagymyzyň başlangyjy esasynda binýat bolan Arkadag şäheriniň Ruhyýet köşgünde “Garaşsyz, baky Bitarap Türkmenistan — bedew batly at-myradyň mekany”: parahatçylygyň, dostlugyň we hyzmatdaşlygyň giňişligi” atly ýokary derejedäki halkara mejlis geçirildi. Oňa ýurdumyzyň Hökümet agzalary, harby we hukuk goraýjy edaralaryň, ministrlikleriň, pudaklaýyn düzümleriň ýolbaşçylary, jemgyýetçilik guramalarynyň, syýasy partiýalaryň agzalary gatnaşdylar. Myhmanlaryň hatarynda daşary döwletleriň we halkara guramalaryň Türkmenistandaky diplomatik wekilhanalarynyň ýolbaşçylary, hormatly ýaşulular, köp sanly ýaşlar bar. Mejlise gatnaşyjylar ilki Ruhyýet köşgüniň eýwanynda ýaýbaňlandyrylan sergi bilen tanyşdylar. Giň möçberli gözden geçirilişde türkmen halkynyň taryhyna we şu günki ýeten derejesine, ösüşleriň belentliklerine tarap gadam urýan ýurdumyzyň sazlaşykly ösüşine bagyşlanan gymmatlyklar görkezildi. Amaly-haşam sungatynyň gymmatlyklary sergä gatnaşyjylarda ýatdan çykmajak täsirleri galdyrdy. Şunda bedew esbaplaryna, şaý-seplerine hem möhüm orun berildi. Soňra “Garaşsyz, baky Bitarap Türkmenistan — bedew batly at-myradyň mekany”: parahatçylygyň, dostlugyň we hyzmatdaşlygyň giňişligi” atly ýokary derejedäki halkara mejlis öz işine başlady. Ahalteke bedewlerine aýratyn gadyr goýýan hormatly Prezidentimiziň “Türkmeniň buýsanjy” atly täze goşgusynyň okalmagy dabara gatnaşyjylarda aýratyn hoşallyk duýgusyny döretdi. Köşgüň ajaýyp sahnasyndaky monitorda ýurdumyzda medeniýet ulgamynda ýetilen sepgitler, halkara hyzmatdaşlyk bilen bagly ähmiýetli wakalar şöhlelendirildi. “Dokmaçylar” medeni merkeziniň folklor-etnografiýa tans toparynyň çeper ýolbaşçysy, Türkmenistanyň Gahrymany Annajemal Nurmuhammedowanyň ýerine ýetiren joşgunly aýdymy dabara özboluşly bezeg berdi. Meşhur sungat ussady ýurdumyzda halkara gatnaşyklaryň netijeli ösdürilýändigini, türkmen sungatyny we medeniýetini dünýä çykarmak ugrunda zerur tagallalaryň edilýändigini aýtdy. Şunda Gahryman Arkadagymyzyň, Arkadagly Gahryman Serdarymyzyň beýik geljegi nazarlaýan işleriniň uly rowaçlyklara beslenýändigi nygtaldy. Bu bolsa medeniýetleriň özara baglanyşygyny pugtalandyryp, onuň üsti bilen Watanymyzyň waspynyň ýetirilmegini üpjün edýär. Mejlisde Türkmenistanyň Döwlet çeperçilik akademiýasynyň uly mugallymy, Türkmenistanyň Gahrymany Saragt Babaýew hem çykyş etdi. Çykyşda bellenilişi ýaly, çeperçilik akademiýasynda talyplara bilim bermek işleri toplumlaýyn esasda alnyp barylýar. Diňe bir ýurdumyzda däl, eýsem, onuň çäklerinden daşarda-da uly meşhurlyk gazanan ussat heýkeltaraş häzirki döwürde sungat äleminde alnyp barylýan işleriň netijeli häsiýete eýe bolmagyna döwlet derejesinde ähmiýet berilýändigini aýtdy. Bu bolsa beýleki ugurlarda bolşy ýaly, milli heýkeltaraşlyk sungatynda hem täze nesilleriň kemala gelmegini üpjün edýär. Munuň özi milli sungatyň beýik geljegi nazarlaýandygynyň we onuň dowamata atarylýandygynyň beýanydyr. S.Babaýew ýaşlaryň arasynda sungatyň heýkeltaraşlyk ugruna höwes bildirýänleriniň köpdügini nygtap, Gahryman Arkadagymyzyň we Arkadagly Gahryman Serdarymyzyň başlangyçlaryndan, atalyk maslahatlaryndan ruhlanyp, talyp ýaşlaryň saýlap alan hünäri boýunça belent derejelere ýetmegi ugrunda döwlet derejesinde yzygiderli alada edilýändigine ünsi çekdi. Şunda ýaşlaryň arasynda ahalteke bedewleriniň çeper keşbini döretmäge höwesekleriň sanynyň artýandygyny bellemek gerek. Soňky ýyllarda hormatly Prezidentimiziň tagallalary netijesinde ýurdumyzyň dünýäniň gyzyklanma bildirýän ýurtlary, abraýly halkara guramalar bilen hyzmatdaşlygy ösüşiň täze derejesine çykarylýar. Şunda Türkmenistan bilen ÝUNESKO-nyň arasynda gatnaşyklar yzygiderli häsiýete eýe bolýar. Soňra ÝUNESKO-nyň işleri barada Türkmenistanyň milli toparynyň jogapkär sekretary, Türkmenistanyň Gahrymany Çynar Rustemowa söz berildi. Ol çykyşynda häzirki wagtda Gahryman Arkadagymyzyň başyny başlan beýik işleriniň hormatly Prezidentimiziň baştutanlygynda üstünlikli durmuşa geçirilýändigini aýtdy. Ç.Rustemowa paýhasly pederlerimiziň we zähmetsöýer halkymyzyň döreden milli gymmatlyklarynyň halkara derejede ykrar edilýändigini, munuň şöhraty dünýä dolan Türkmenistanda alnyp barylýan işleriň dünýä nusgalykdygyny alamatlandyrýandygyny nygtady. Şunuň bilen baglylykda, bu ugurda alnyp barylýan işler, aýratyn-da, abraýly halkara guramalaryň çäklerinde ýola goýulýan gatnaşyklar işjeň ösdürilýär. Bellenilişi ýaly, «Görogly» dessançylyk sungaty, «Küştdepdi» aýdym we tans dessury, dutar ýasamak senetçiligi, dutarda saz çalmak we bagşyçylyk sungaty, türkmen milli halyçylyk sungaty, türkmen keşdeçilik sungaty, ýüpekçilik we dokmaçylykda ýüpek önümçiliginiň däpleri, molla Ependiniň şorta sözlerini gürrüň berijilik däbi, ahalteke atçylyk sungaty we atlary bezemek däpleri ÝUNESKO-nyň Adamzadyň maddy däl medeni mirasynyň sanawyna girizildi. Bu bolsa paýhasly pederlerimiziň yhlasyndan dörän milli gymmatlyklaryň dünýä derejesinde ykrar edilýändigini görkezýär. Bu ýerde kaşaň sahnada oturdylan monitorda ady rowaýata öwrülen ahalteke bedewlerine, olaryň taryhyna, ýyndamlygyna, reňk aýratynlyklaryna bagyşlanan wideoşekiller görkezildi. Diýarymyzda baý taryhy we ruhy mirasy gorap saklamakda, ony dünýäde giňden wagyz etmekde hormatly Prezidentimiziň edýän tagallalaryndan ruhlanyp, asyrlar aşyp gelýän ýörelgeleriň mundan beýläk-de ösdürilmegine aýratyn üns berilýär. Beýik Britaniýanyň we Demirgazyk Irlandiýanyň Birleşen Patyşalygynyň Türkmenistandaky Adatdan daşary we Doly ygtyýarly ilçisi Stiwen Konlon öz çykyşynda ahalteke bedewleriniň asyl mekanynda alnyp barylýan işlere, atlar üçin döredilen şertlere ýokary baha berdi. Nygtalyşy ýaly, Ýewropanyň, Aziýanyň, Amerikanyň köp sanly ýurtlarynda ahalteke bedewlerini saklamak, olary ösdürip ýetişdirmek, atlary iri bäsleşiklere gatnaşdyrmak meselelerine möhüm ähmiýet berilýär. Bu bolsa bedewleriň dünýäde mynasyp orun eýeleýändiginiň we olaryň atçylyk sporty boýunça uly ýeňişleri gazanmaga ukyplydygynyň güwäsidir. Ilçiniň çykyşynyň bütin dowamynda monitorda Beýik Britaniýadaky Windzor galasynda Gahryman Arkadagymyzyň hem gatnaşmagynda geçirilen atly sport çärelerindäki çykyşlardan we ol ýerde ýaýbaňlandyrylan sergi-ýarmarkadan wideoşekiller görkezildi. Soňra Niderlandlar Patyşalygynyň Kronenberg şäherinde geçirilen ahalteke atlarynyň arasynda gözellik we atly sport bäsleşikleri boýunça dünýä çempionatynyň baş baýragyna mynasyp bolan atyň eýesi, fransiýaly atşynas Odri Martinesiň wideoýazgy arkaly çykyşy diňlenildi. Ol çykyşynda öz atynyň dünýä giňişliginde belent şöhrata eýe bolan ahalteke bedewleriniň arasyndaky dünýä çempionatynyň baş baýragyna mynasyp bolmagynyň özi üçin uly hormatdygyny belledi. Atşynas Türkmenistanda bu pudagy ösdürmek babatda döredilýän mümkinçilikler üçin Gahryman Arkadagymyza we Arkadagly Gahryman Serdarymyza tüýs ýürekden hoşallygyny beýan etdi. Soňra türkmen halkynyň Milli Lideriniň gatnaşmagynda Russiýa Federasiýasynyň Tatarystan Respublikasynyň Kazan şäherinde geçirilen halkara at çapyşyklaryna, onda ýurdumyzdan ýeňiji bolan çapyksuwarlara bagyşlanan wideoşekiller görkezildi. Fransiýa Respublikasynyň Türkmenistandaky Adatdan daşary we Doly ygtyýarly ilçisi Alena Grandyň çykyşy ahalteke bedewleriniň özboluşly aýratynlygyna bagyşlandy. Häzirki döwürde türkmen halkynyň dünýä beren milli gymmatlygy bolan ahalteke bedewleriniň halkara giňişlikdäki şöhraty barha belende galýar. Bu bolsa Türkmenistanda atçylyk pudagynyň ösdürilmegi we ýurduň atşynaslarynyň iri bäsleşiklere işjeň gatnaşmagy bilen baglanyşykly meselelere döwlet derejesinde ähmiýet berilýändigini subut edýär. Diplomat ýurdumyzda hormatly Prezidentimiziň we Gahryman Arkadagymyzyň tagallalary netijesinde döwrebap aýlawlaryň, atçylyk sport toplumlarynyň gurulýandygyny, bu işleriň Türkmenistanda atly sporty ösdürmek ugrunda zerur tagallalaryň edilýändiginiň aýdyň beýanydygyny nygtady. Ilçiniň çykyşy Gahryman Arkadagymyzyň gatnaşmagynda Niderlandlar Patyşalygynyň Kronenberg şäherinde geçirilen ahalteke atlarynyň arasynda gözellik we atly sport bäsleşikleri boýunça dünýä çempionatynyň baş baýragyna mynasyp bolan fransiýaly atşynasyň baýrak alyp duran pursatlaryndan wideoşekiller bilen utgaşdy. Soňra Ukrainanyň Daşary işler ministrliginiň Merkezi Aziýa boýunça ýörite wekili Wiktor Maýko çykyş etdi. Ol türkmen topragynda bildirilen myhmansöýerlik üçin hormatly Prezidentimize we Gahryman Arkadagymyza tüýs ýürekden hoşallyk bildirdi. Diplomat çykyşynda dünýäde meşhurlyk gazanan ahalteke bedewleriniň taryhyna, şu gününe we milli seýisçilik sungatyna bagyşlanan halkara mejlise gatnaşyp, çykyş etmegiň özi üçin uly hormatdygyny aýtdy. Onuň belleýşi ýaly, dürli döwürleridir nesilleri baglanyşdyrýan ahalteke bedewleri häzirki döwrüň parahatçylykly gatnaşyklarynyň nyşany hasaplanýar. W.Maýkonyň çykyşy Kronenberg şäherinde geçirilen dünýä çempionatynda ukrainaly atşynaslaryň baýrak alyp duran

Aşgabat, 11-nji sentýabr (TDH). Şu gün hormatly Prezidentimiz Serdar Berdimuhamedow ýurdumyza sapar bilen gelen Ýaponiýanyň ykdysadyýet, söwda we senagat boýunça döwlet ministri Kenji Ýamadany kabul etdi. Kenji Ýamada duşuşmaga döredilen mümkinçilik hem-de bildirilen myhmansöýerlik üçin hoşallygyny beýan edip, Ýaponiýada Türkmenistan bilen köpugurly gatnaşyklaryň ösdürilmegine uly ähmiýet berilýändigini belledi hem-de pursatdan peýdalanyp, Ýaponiýanyň Imperatory Naruhitonyň, Premýer-ministri Sanae Takaitiniň hormatly Prezidentimize we Gahryman Arkadagymyza iberen mähirli salamyny ýetirdi. Şeýle-de ol hormatly Prezidentimiziň “Merkezi Aziýa — Ýaponiýa” dialogynyň birinji sammitine, Osaka şäherinde geçirilen “EKSPO — 2025” Bütindünýä sergisine gatnaşmak üçin Ýaponiýa amala aşyran saparlarynyň ähmiýetini belledi. Myhman Bütindünýä sergisinde ilkinji bolup Türkmenistanyň Milli gününiň geçirilmeginiň sergide ýurdumyza uly gyzyklanma döredendigini aýtdy. Döwlet Baştutanymyz hoşniýetli sözler üçin minnetdarlyk bildirip, Ýaponiýanyň ýolbaşçylaryna iň gowy arzuwlaryny beýan etdi hem-de Kenji Ýamadanyň şu saparynyň dowamynda geçirjek duşuşyklarynyň netijeleriniň türkmen-ýapon ykdysady gatnaşyklarynyň ösdürilmegine möhüm goşant goşjakdygyna ynam bildirdi. Duşuşygyň dowamynda bellenilişi ýaly, Türkmenistan bilen Ýaponiýanyň arasyndaky dostlukly, özara bähbitli gatnaşyklar birek-birege hormat goýmak, deňhukuklylyk we ynanyşmak ýörelgeleri esasynda yzygiderli ösdürilýär. Ikitaraplaýyn gatnaşyklar köpugurly häsiýete eýe bolup, syýasy-diplomatik, söwda-ykdysady, medeni-ynsanperwer ugurlary öz içine alýar. Hormatly Prezidentimiz syýasy-diplomatik gatnaşyklar barada aýdyp, soňky ýyllarda ýokary derejede amala aşyrylýan özara saparlaryň bu ugurdaky hyzmatdaşlygy hil taýdan täze derejä çykarmaga ýardam berýändigini nygtady. Bu gatnaşyklar diňe bir ikitaraplaýyn esasda däl, eýsem, köptaraplaýyn görnüşde, ýagny «Merkezi Aziýa — Ýaponiýa» dialogynyň çäklerinde hem üstünlikli ösdürilýär. Söwda-ykdysady hyzmatdaşlyk türkmen-ýapon gatnaşyklarynyň möhüm bölegi bolup durýar. Ol ýokary tehnologiýalar, maýa goýumlar ugurlaryndaky hyzmatdaşlyga, umumy strategik maksatlara esaslanyp, iki ýurduň milli bähbitlerine laýyklykda çalt depginde ösdürilýär. Ýurdumyzda ulag, gazhimiýa, agrosenagat ulgamlarynda iri taslamalary durmuşa geçirmekde Ýaponiýanyň öňdebaryjy kompaniýalary bilen netijeli hyzmatdaşlyk etmegiň baý tejribesi toplandy. Döwlet Baştutanymyz Türkmenistanda Ýaponiýanyň innowasion tehnologiýalarda hem-de döwrebap inženerçilik ugurlarynda toplan baý tejribesine ýokary baha berilýändigini, ykdysadyýet, söwda we senagat ugurlary boýunça hyzmatdaşlygy mundan beýläk-de giňeltmäge uly gyzyklanma bildirilýändigini aýdyp, özara gatnaşyklary ösdürmek üçin amatly şertleriň bardygyna ünsi çekdi. Duşuşygyň ahyrynda hormatly Prezidentimiz Serdar Berdimuhamedow hem-de Ýaponiýanyň ykdysadyýet, söwda we senagat boýunça döwlet ministri Kenji Ýamada däp bolan dostlukly türkmen-ýapon gatnaşyklarynyň hem-de netijeli hyzmatdaşlygyň iki ýurduň we olaryň halklarynyň bähbidine mundan beýläk-de ösdüriljekdigine ynam bildirip, birek-birege iň gowy arzuwlaryny beýan etdiler.