Baýramçylyk dabaralaryna baý bolan geçen hepdäniň wakalary Gahryman Arkadagymyzyň başyny başlan, hormatly Prezidentimiz Serdar Berdimuhamedow tarapyndan üstünlikli durmuşa geçirilýän döredijilikli strategiýanyň rowaçlyklara beslenýändiginiň aýdyň güwäsi boldy. Bu strategiýa ýurdumyzyň syýasy we ykdysady durnuklylygyny saklamaga, uzak möhletleýin geljegi nazarlaýan Watanymyzyň gülläp ösmegi üçin ygtybarly binýady döretmäge gönükdirilendir. 28-nji sentýabrda hormatly Prezidentimiz Serdar Berdimuhamedow ýurdumyzyň mukaddes Garaşsyzlygynyň 35 ýyllygy mynasybetli Aşgabat atçylyk sport toplumynda guralan baýramçylyk dabaralaryna gatnaşdy. Şol gün toplumyň çägi zergärleriň, halyçylaryň, fotosuratçylaryň, şekillendiriş we amaly-haşam sungatynyň ussatlarynyň “asman atlaryna” bagyşlanan işleriniň giň gerimli sergi meýdançasyna öwrüldi. Bedewler Türkmenistanyň esasy pudaklaýyn toplumlarynyň baýraklaryny almak ugrunda bäsleşip, dürli aralyklara geçirilen ýedi çapyşykda özleriniň iň gowy beden taýýarlyklaryny görkezdiler. Jemleýji, ýedinji çapyşykda pellehanadan ilkinji bolup geçmegi başaran Türkmenistanyň Prezidentiniň Ahalteke atçylyk toplumyna degişli Bezirgen atly akýal mele atyň çapyksuwaryna Türkmenistanyň Prezidentiniň baş baýragy hem-de göçme kubogy gowşuryldy. Dabaralaryň çäklerinde hormatly Prezidentimiz Serdar Berdimuhamedow daşary ýurtly işewür toparlaryň wekilleri bilen birnäçe duşuşyklary geçirdi. Hususan-da, döwlet Baştutanymyz “Toyo Engineering Corporation” ýapon kompaniýasynyň prezidenti, Baş ýerine ýetiriji direktory, wekilçilik müdiri Eiji Hosoini hem-de Koreýanyň «Daewoo Engineering & Construction Co., Ltd.» kompaniýasynyň prezidenti Li Kan-Soky kabul etdi. Gepleşikleriň dowamynda işewür hyzmatdaşlaryň Türkmenistanda giň gerimli ykdysady taslamalary durmuşa geçirmäge gatnaşmagyny giňeltmek meseleleri ara alnyp maslahatlaşyldy. 28-nji sentýabrda paýtagtymyzda hormatly Prezidentimiz Serdar Berdimuhamedowyň gatnaşmagynda 2010-njy ýylda Gahryman Arkadagymyzyň başlangyjy bilen döredilen hem-de bu günki günde ýurdumyzdan we dünýäniň 40-a golaý döwletinden 213 agzany birleşdirýän Halkara ahalteke atçylyk assosiasiýasynyň XVI mejlisi geçirildi. Mejlisde çykyş etmek bilen, hormatly Prezidentimiz milli mirasymyzy aýawly saklamagyň we dünýä ýaýmagyň Türkmenistanyň alyp barýan döwlet syýasatynyň esasy ugurlarynyň biri bolup durýandygyny belledi. «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylda türkmen ahalteke atlary parahatçylygyň we medeni ýakynlygyň ilçileri diýen hoşniýetli wezipäni ynamly berjaý edýärler. Bu babatda ýakynda Gahryman Arkadagymyzyň gatnaşmagynda Niderlandlar Patyşalygynda Halkara ahalteke atçylyk assosiasiýasynyň açyk mejlisiniň, şeýle hem «Pilbergen» atçylyk sport toplumynda 35 döwletden 100-den gowrak bedewi hem-de hünärmenleri bir ýere jemlän ahalteke atlarynyň arasynda atly sport we gözellik bäsleşiginiň dünýä çempionatynyň geçirilmegi behişdi bedewlerimiziň dünýä ýüzündäki şan-şöhratyny artdyrmakda möhüm ähmiýete eýe boldy. Mejlisiň çäklerinde döwlet Baştutanymyz Halkara ahalteke atçylyk assosiasiýasynyň işini has-da kämilleşdirmek, ýurdumyzyň hem-de daşary ýurtlaryň raýatlaryna hormatly atlary dakmak maksady bilen taýýarlanylan resminamalara gol çekdi. Gol çekilen resminamalaryň hatarynda ahalteke atlarynyň arasynda atly sport we gözellik bäsleşiginiň dünýä çempionatyny her bäş ýyldan bir gezek geçirmek, ahalteke atlaryny konkuryň we atly sportuň beýleki görnüşleriniň halkara talaplaryna laýyklykda taýýarlamak boýunça ýöriteleşdirilen okuw-türgenleşik maksatnamalaryny taýýarlamak, ahalteke atlarynyň arasynda geçiriljek atly sport boýunça iri bäsleşiklerde Halkara ahalteke atçylyk assosiasiýasynyň ýörite halkara baýraklaryny we kuboklaryny döretmek, ahalteke atlarynda atly syýahatçylygy ösdürmek, Ahalteke atlarynyň halkara tohumçylyk geňeşini döretmek hakynda Kararlar bar. Daşary ýurtly wekiller zähmetine berlen ýokary baha üçin tüýs ýürekden hoşallyk bildirdiler hem-de ahalteke atlarynyň gadymy watanynda tejribe alyşmagyň möhümdigini nygtap, özara hyzmatdaşlygyň durnukly ösdürilmegi baradaky garaýyşlaryny beýan etdiler. 28-nji sentýabrda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Garaşsyzlyk güni mynasybetli dabaralara gatnaşmak üçin ýurdumyza gelen daşary ýurtly myhmanlar bilen duşuşyklary geçirdi. Gahryman Arkadagymyz Russiýa Federasiýasynyň Tatarystan Respublikasynyň Baştutany Rustam Minnihanow, «Rönesans Holding» türk kompaniýasynyň müdiriýetiniň başlygy Erman Ylyjak, şeýle hem «Çalyk Holding» kompaniýalar toparynyň dolandyryjylar geňeşiniň başlygy Ahmet Çalyk bilen duşuşyp, köptaraplaýyn döwletara hyzmatdaşlygy giňeltmegiň hem-de daşary ýurt kompaniýalarynyň ýurdumyzda durmuşa geçirilýän taslamalara gatnaşmagynyň meselelerini ara alyp maslahatlaşdy. 29-njy sentýabrda geçirilen Türkmenistanyň Prezidentiniň 1200 orunlyk Ahalteke atçylyk toplumynyň açylyş dabarasy «Garaşsyz, baky Bitarap Türkmenistan — bedew batly at-myradyň mekany» ýylynyň möhüm çäreleriniň üstüni ýetirdi. Bu waka mynasybetli geçirilen dabara hormatly Prezidentimiz we Gahryman Arkadagymyz gatnaşdylar. Medeniýet we sungat ussatlarynyň, tans hem-de folklor toparlarynyň, dünýä belli «Galkynyş» milli at üstündäki oýunlar toparynyň agzalarynyň çykyşlary hem-de atly sport we konkur boýunça türgenleriň görkezme çykyşlary, türkmen milli göreşi boýunça pälwanlaryň tutluşyklary, häzirki zaman tehnologiýalary esasynda yşyklandyrylan şüweleň kompozisiýasy milli däp-dessurlara laýyklykda guralan baýramçylyk toýunyň ruhubelentlik ýagdaýyny has-da belende göterdi. Türkmenistanyň Prezidentiniň Ahalteke atçylyk toplumynda bedewleriň arassa ganlylygyny saklamak, olaryň baş sanyny artdyrmak üçin ähli zerur şertler döredilipdir. Toplumyň çägindäki bölümlerde we barlaghanalarda döwrebap enjamlar atlaryň tohumçylyk işini, saglyk ýagdaýyny, beden gurluşyny ylmy esasda öwrenmäge ýardam berýär. Toplumyň esasy hem-de dolandyryş binalary ylmyň we tehnologiýanyň soňky gazananlary bilen üpjün edildi. Dolandyryş binasynda sanly ulgam arkaly atlaryň saklanyşy, iýmitlenişi, şeýle hem näçe wagt ukuda, näçe wagt aýak üstünde durandygy bilen tanşyp bolýar. Athanalar, atçylyk sporty boýunça türgenleşikleri geçirmäge niýetlenen açyk we ýapyk manežler, atlaryň suwda türgenleşdirilýän desgasy, çapuw ýodalary, atlary seýislemäge we ahalteke bedewleriniň gözellik bäsleşigini geçirmäge niýetlenen meýdançalar häzirki zamanyň ösen talaplaryna laýyk gelýär. Ýörite fotostudiýada bolsa atlar bilen ýylyň dört paslyny alamatlandyrýan görnüşlerde surata düşüp bolýar. Bedewleri ýokumly iýmler bilen üpjün etmegiň möhümdigi göz öňünde tutulyp, toplumyň çägindäki alma baglarynda ösen aýratyn görnüş — «Babarap almasy» ekildi. Ýörite meýdanda toplumyň bedewlerine niýetlenen käşir we ýorunja hem ösdürilip ýetişdirilýär. Gahryman Arkadagymyz Türkmenistanyň Prezidenti, Halkara ahalteke atçylyk assosiasiýasynyň Prezidenti Serdar Berdimuhamedowyň Karary esasynda, ahalteke atlaryny ösdürip ýetişdirmekde, olaryň sanyny artdyrmakda we türkmeniň atşynaslyk sungatyny dünýä ýaýmakda alyp barýan işlerini göz öňünde tutup, assosiasiýanyň agzasy, Hytaý Halk Respublikasynyň “Daqing Huiyou Breeding Co., Ltd.” atçylyk kompaniýasynyň başlygy Liu Şutsine 2023-nji ýylda doglan, mele reňkli, Dosthan atly ahalteke bedewini we oňa degişli güwänamany gowşurdy. Hytaýly myhman ahalteke bedewleriniň asyl mekanynda bolup, Gahryman Arkadag bilen didarlaşmagyň we dünýä atşynaslarynyň baş arzuwyna öwrülen ahalteke bedewiniň sowgat berilmeginiň özi üçin belent mertebedigini nygtady. Liu Şutsin kompaniýasynda 1200 baş atyň bardygyny, olaryň 600-den gowragynyň ahalteke bedewleridigini aýratyn buýsanç bilen habar berdi. Gahryman Arkadagymyzyň badalga bermegi bilen, 35 atly ýigidiň gatnaşmagynda geçirilen dabaraly ýöriş hem-de ussat çapyksuwarlaryň toý çapuwy dabaranyň esasy wakalary boldy. Şanly toýuň hormatyna guralan toý çapuwynda birinji orna we baş baýraga ýaş seýis Kerimguly Berdimuhamedowyň taýýarlan Daghan atly bedewi mynasyp boldy. Ony bu ýaryşda türkmen halkynyň Milli Lideri, Türkmenistanyň halk atşynasy, Türkmenistanyň ussat halypa çapyksuwary Gahryman Arkadagymyz çapdy. Milli Liderimiziň çözgüdi bilen, birinji orun üçin baş baýrak — “Range Rover Sport” awtoulagy Türkmenistanyň Goranmak ministrligine, ýagny seržant Kerimguly Berdimuhamedowyň gulluk edýän harby bölümine sowgat hökmünde geçirildi. Baýramçylyk maksatnamasyna türkmen alabaý itleriniň gözellik bäsleşigi hem girizildi. Onda ýeňiş gazanan Arwana atly türkmen alabaýy we onuň eýesi “Toyota Corolla” awtoulagy bilen sylaglanyldy. Çapuw meýdançasynda türkmen toýy bilen bagly däp-dessurlaryň görkezilişi bu ýerde ýaýbaňlandyrylan baýramçylyk dabaralaryna özboluşly

Siziň Alyhezretiňiz! Indoneziýa Respublikasynyň Hökümetiniň we halkynyň adyndan Siziň Alyhezretiňizi hem-de türkmen halkyny Türkmenistanyň Garaşsyzlyk güni mynasybetli tüýs ýürekden gutlamaga şatdyryn. Indoneziýa Türkmenistan bilen köp ýyllaryň dowamynda ýola goýlan dostlukly gatnaşyklara, şeýle hem okgunly ösdürilýän ikitaraplaýyn hyzmatdaşlyga ýokary baha berýär. Halkara ýagdaýyň üýtgäp durýan şertlerinde biz söwda, energetika, ylym-bilim, syýahatçylyk ýaly ulgamlarda ikitaraplaýyn gatnaşyklaryň pugtalandyrylmagyna hem-de özara bähbitli hyzmatdaşlygyň mundan beýläk-de giňeldilmegine uly ähmiýet berýäris. Hyzmatdaşlygymyzyň üstünlikli dowam etdirilmeginiň iki ýurduň halklarynyň bähbidine oňyn netijeleriň gazanylmagyna we indoneziýa-türkmen gatnaşyklarynyň mundan beýläk-de çuňlaşdyrylmagyna ýardam berjekdigine ynanýaryn. Pursatdan peýdalanyp, şanly sene mynasybetli Türkmenistana gülläp ösüş, halkyňyza bolsa abadançylyk we rowaçlyk arzuw edýärin. Siziň Alyhezretiňiz, Size belent hormat goýýandygym baradaky ynandyrmalarymy kabul ediň! Prabowo SUBIANTO,Indoneziýa Respublikasynyň Prezidenti. Onuň Alyhezreti, Türkmenistanyň Prezidenti jenap Serdar BERDIMUHAMEDOWA Siziň Alyhezretiňiz! Türkmenistanyň Garaşsyzlyk güni mynasybetli Siziň Alyhezretiňize, Türkmenistanyň Hökümetine we halkyna Günorta Afrika Respublikasynyň Hökümetiniň we halkynyň adyndan tüýs ýürekden gutlaglarymy we iň gowy arzuwlarymy beýan edýärin. Mümkinçilikden peýdalanyp, Siziň Alyhezretiňize berk jan saglyk arzuw edýärin, şeýle hem ýurtlarymyzyň arasyndaky dostlukly gatnaşyklary mundan beýläk-de pugtalandyrmaga gyzyklanma bildirýändigimi tassyklaýaryn. Siziň Alyhezretiňiz, Size belent hormat goýýandygym baradaky ynandyrmalarymy kabul ediň! Matamela Siril RAMAFOSA,Günorta Afrika Respublikasynyň Prezidenti. Onuň Alyhezreti, Türkmenistanyň Prezidenti jenap Serdar BERDIMUHAMEDOWA Siziň Alyhezretiňiz! Bolgariýanyň halkynyň adyndan we hut öz adymdan Size hem-de Türkmenistanyň halkyna Garaşsyzlyk güni mynasybetli tüýs ýürekden gutlaglarymy we parahatçylyk, gülläp ösüş baradaky arzuwlarymy beýan edýärin. Bolgariýa Respublikasy Türkmenistan bilen ikitaraplaýyn gatnaşyklaryň ösdürilmegine uly ähmiýet berýär hem-de Siziň ýurduňyza Merkezi Aziýa sebitinde möhüm hyzmatdaş hökmünde garaýar. Bolgariýa özara gyzyklanma bildirilýän ulgamlarda ikitaraplaýyn gatnaşyklary dostluk we netijeli hyzmatdaşlyk ruhunda ösdürmäge çalyşýar. Bilelikdäki tagallalar arkaly iki ýurtda bar bolan mümkinçilikleri, şol sanda Ýewropa bilen Aziýanyň arasyndaky gatnaşyklary ösdürmekde mümkinçiliklerimizi doly derejede amala aşyryp biljekdigimize ynanýaryn. Size berk jan saglyk we jogapkärli döwlet işiňizde uly üstünlikleri arzuw edýärin. Siziň Alyhezretiňize belent hormat goýýandygym baradaky ynandyrmalarymy kabul ediň! Iliana ÝOTOWA,Bolgariýa Respublikasynyň Prezidenti. Onuň Alyhezreti, Türkmenistanyň Prezidenti jenap Serdar BERDIMUHAMEDOWA Hormatly jenap Prezident! Türkmenistanyň Garaşsyzlygynyň şanly 35 ýyllygy mynasybetli Siziň Alyhezretiňize we halkyňyza tüýs ýürekden gutlaglarymy we iň gowy arzuwlarymy beýan edýärin. Kamboja Patyşalygynyň we Türkmenistanyň arasynda ýola goýlan dostlukly gatnaşyklary kanagatlanma bilen belleýärin. Geljek ýyllarda ýurtlarymyzyň arasyndaky dostlukly gatnaşyklaryň ösdüriljekdigine hem-de özara gyzyklanma bildirilýän ugurlarda, ikitaraplaýyn derejede, şeýle-de köptaraplaýyn görnüşde halklarymyzyň abadançylygynyň we gülläp ösmeginiň bähbidine giňeldiljekdigine ynanýaryn. Mümkinçilikden peýdalanyp, Siziň Alyhezretiňize uly üstünlikler, Türkmenistanyň dostlukly halkyna bolsa parahatçylyk, ösüş we rowaçlyk arzuw edýärin. Jenap Prezident, Size belent hormat goýýandygym baradaky ynandyrmalarymy kabul ediň! Hormatlamak bilen, Norodom SIAMONI,Kambojanyň Patyşasy. Onuň Alyhezreti, Türkmenistanyň Prezidenti jenap Serdar BERDIMUHAMEDOWA Hormatly jenap Prezident! Sloweniýa Respublikasynyň raýatlarynyň adyndan hem-de hut öz adymdan Türkmenistanyň Garaşsyzlyk güni mynasybetli tüýs ýürekden gutlaglarymy hem-de ýurduňyza we halkyňyza parahatçylyk, gülläp ösüş baradaky arzuwlarymy beýan edýärin. Sloweniýada Türkmenistan bilen özara hormat goýmak, ynanyşmak hem-de hyzmatdaşlyk ýörelgelerine esaslanýan dostlukly gatnaşyklara ýokary baha berilýär. Biziň geljekde hem bu gatnaşyklary ikitaraplaýyn we köptaraplaýyn derejede ösdürjekdigimize, bilelikdäki tagallalar arkaly halkara giňişlikde parahatçylyga, durnuklylyga we özara düşünişmek ýörelgelerine ýardam etjekdigimize ynanýaryn. Hormatly jenap Prezident, Size belent hormat goýýandygym baradaky ynandyrmalarymy kabul ediň! Nataşa PIRS-MUSAR,Sloweniýa Respublikasynyň Prezidenti. Onuň Alyhezreti, Türkmenistanyň Prezidenti jenap Serdar BERDIMUHAMEDOWA Siziň Alyhezretiňiz! Gruziýanyň Hökümetiniň adyndan hem-de hut öz adymdan Sizi Türkmenistanyň Garaşsyzlyk güni bilen tüýs ýürekden gutlaýaryn. Biziň ýurtlarymyzyň arasynda ýola goýlan köpýyllyk dostlukly gatnaşyklaryň hem-de hyzmatdaşlygyň üstünlikli ösdürilýändigine şatdyryn. Şunuň bilen baglylykda, Siziň Gruziýa amala aşyran saparyňyz aýratyn ähmiýete eýe boldy hem-de ikitaraplaýyn gatnaşyklaryň ösdürilmegine uly itergi berdi. Bilelikdäki tagallalar netijesinde ýurtlarymyzyň arasyndaky hyzmatdaşlygyň halklarymyzyň bähbidine geljekde has-da ösdüriljekdigine ynanýaryn. Siziň Alyhezretiňize belent hormat goýýandygym baradaky ynandyrmalarymy beýan etmek bilen, Size parahatçylyk, ösüş we abadançylyk arzuw edýärin. Hormatlamak bilen, Irakliý KOBAHIDZE,Gruziýanyň Premýer-ministri.

Bismillähir-rahmänir-rahim!Çuňňur hormatlanylýan belent mertebeli Prezidentimiz! Türkmen halkynyň müňýyllyklaryň jümmüşinden gözbaş alyp gaýdýan ynsanperwer ýörelgeleriniň arasynda öten-geçenleri ýagşylykda ýatlamak, hatyra dessurlaryny berjaý etmek aýratyn orun tutýar. Hormatly Arkadagly Gahryman hajy Serdarymyz, Siziň parasatly baştutanlygyňyzda bedew bady bilen ösüşleriň täze belentliklerine tarap ynamly öňe barýan Garaşsyz ýurdumyzyň abraý-mertebesi dünýä dolýan Berkarar döwletiň täze eýýamynyň Galkynyşy döwründe halk hakydasynda müdimi orun alan hem-de jemgyýetimizde agzybirligi, özara hormat-sylagy, ruhy bitewüligi pugtalandyrýan ynsanperwer ýörelgelerimiz, däp-dessurlarymyz, adatlarymyz mynasyp dowam etdirilýär. Hormatly sarpasy belent Gahryman hajy Serdarymyz! Siziň nesilme-nesil dowamat-dowam bolup gelýän ýokary ynsanperwer gymmatlyklarymyza goýulýan belent sarpany dabaralandyrýan başlangyçlaryňyzdan hem-de jemgyýetimizi ynsanperwerlik ruhunda ösdürmek ugrundaky maksatlaryňyzdan ugur alyp, «Garaşsyz, baky Bitarap Türkmenistan — bedew batly at-myradyň mekany» ýylynda, Hatyra gününde Watan topragyny goramak ugrunda alnyp barlan söweşlerde, Beýik Watançylyk urşunda, 1948-nji ýylda bolup geçen Aşgabat ýertitremesinde şehit bolan watandaşlarymyzyň hormatyna paýtagtymyz Aşgabat şäherindäki «Halk hakydasy» ýadygärlikler toplumynda, eziz Diýarymyzyň ähli obadyr şäherlerinde ýatlama çäreleri geçirilýär. Agzybirligimizi we jebisligimizi has-da pugtalandyrýan Hatyra gününde häzirki zaman binagärlik däplerine laýyk gelýän täze, döwrebap metjitlerde, Arkadagly Gahryman hajy Serdarymyz, Siziň Garaşsyz, Bitarap Watanymyzyň gülläp ösmegi ugrunda alyp barýan nusgalyk işleriňiziň, dünýäde parahatçylygy we dostlugy pugtalandyrýan beýik başlangyçlaryňyzyň elmydama rowaçlyklara beslenmegi üçin Gudraty Güýçli Beýik Biribara sygnyp, doga-dilegler edilýär. Bularyň ählisi Siziň «Watan diňe halky bilen Watandyr! Döwlet diňe halky bilen döwletdir!» diýen şygaryňyza laýyklykda, beden we ruhy tämizlige, ahlak arassalygyna aýratyn ähmiýet beren pederlerimiziň asylly ýörelgelerini, dini we dünýewi ygtykatlarymyzy baýlaşdyrmak hem-de dünýä ýaýmak arkaly milli mertebämiziň beýgelýändigini, jemgyýetimiziň ynsanperwerligiň belent ýörelgeleri we milli däplerimiz esasynda kämilleşmegine aýratyn ähmiýet berilýändigini tassyk edýär. Hormatly Arkadagly Gahryman hajy Serdarymyz! Siziň Berkarar döwletiň täze eýýamynyň Galkynyşy döwründe amala aşyrýan döwlet syýasatyňyzyň, giň gerimli özgertmeleriňiziň baş maksady Garaşsyzlygymyzyň we Bitaraplygymyzyň binýadyny has-da berkitmekden, ilatymyzyň ýaşaýyş-durmuş şertlerini gowulandyrmakdan ybarat bolup, bu ugurda ägirt uly işler durmuşa geçirilýär. Maksatnamalara, strategiýalara, konsepsiýalara laýyklykda, milli ykdysadyýetimiz durnukly we sazlaşykly ösdürilýär hem-de dünýäniň ykdysady giňişligine üstünlikli goşulyşýar. 2026-njy ýylyň 23-nji sentýabrynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlyklyk etmeginde geçirilen Türkmenistanyň Halk Maslahatynyň taryhy mejlisinde, hormatly Prezidentimiz, Siz Garaşsyzlygymyzyň we Bitaraplygymyzyň binýatlaryny has-da berkitmek, halkara abraýyny ýokarlandyrmak, ykdysady kuwwatyny artdyrmak, raýatlaryň durmuş goraglylygyny, iş üpjünçiligini we ýaşaýyş-durmuş derejesini ýokarlandyrmak bilen bagly goýan täze belent wezipeleriňiz hem-de maksatlaryňyz ýurdumyzyň her bir raýatynda ruhlandyryjy duýgulary döredip, jemgyýetimiziň watançylyk ruhuny, her bir güni beýik ösüşlere beslenen Berkarar döwletiň täze eýýamynyň Galkynyşy döwrüne bolan buýsanjyny has-da belende göterdi. Siziň bu taryhy mejlisde: «Häzirki wagtda ýurdumyzda gazanylýan üstünlikler biziň her birimizde hakyky watançylyk duýgusyny, milli buýsanjy döredýär. Garaşsyz, hemişelik Bitarap Türkmenistan Watanymyzyň abraýyny belende galdyrmak, Watanymyzy, halkymyzy söýmek hem-de guwanmak biziň her birimiziň borjumyzdyr. Şoňa görä-de, Garaşsyzlygymyz we hemişelik Bitaraplygymyz, bagtyýar we abadan durmuşymyz üçin örän tutanýerlilik bilen zähmet çekmelidiris. Öňde goýlan täze wezipeleri hem-de belent maksatlary agzybirlikde amala aşyrmalydyrys» diýen ruhlandyryjy sözleriňiz mähriban halkymyzyň kalbyna mukaddes şygar bolup ornaşdy. Gahryman hajy Arkadagymyzyň hem-de Arkadagly Gahryman hajy Serdarymyz, Siziň gatnaşmagyňyzda Aşgabat şäherinde Garaşsyzlygymyzyň 35 ýyllygy we Türkmenistanyň Halk Maslahatynyň mejlisiniň üstünlikli geçmegi mynasybetli sadaka bermegiňiz, täze taryhymyza altyn harplar bilen ýazylýan şanly sahypalar, bitirilýän uly işler, milli ýörelgelerimiziň nusgalyk derejede dowam etdirilmegi, bagtyýarlygymyz we rowaçlygymyz, tutuş halkymyz bilen birlikde, biz — dindarlary örän begendirýär, eziz Watanymyza, Gahryman Arkadagymyza hem-de hormatly Prezidentimiz, Size bolan buýsanjymyzy has-da artdyrýar. Hormatly Gahryman hajy Serdarymyz! Hatyra güni mukaddes Watan topragyny goramak ugrunda alnyp barlan söweşlerde, Beýik Watançylyk urşunda, şonuň ýaly-da, 1948-nji ýylda bolup geçen Aşgabat ýertitremesinde şehit bolan ata-babalarymyzy ýatlap, eziz Watanymyzyň berkararlygy, merdana halkymyzyň agzybirligi we abadançylygy üçin okalýan aýatlar hem-de edilýän doga-dilegler Gudraty Güýçli Beýik Biribaryň dergähinde kabul bolsun! Goý, şehit bolan watandaşlarymyzyň ýatan ýerleri ýagty, imanlary hemra bolsun! Belent mertebeli Gahryman Prezidentimiz, Siziň parasatly baştutanlygyňyzda Berkarar döwletiň täze eýýamynyň Galkynyşy döwrüniň röwşen ýolundan beýik geljegine ynamly gadam urýan eziz Watanymyzda asudalyk, abadançylyk, agzybirlik ebedi bolsun! Gudraty Güýçli Allatagala, Arkadagly Gahryman hajy Serdarymyz, Sizi öz penasynda aman saklap, janyňyzy sag, ömrüňizi uzak, mertebäňizi belent, il-ýurt, umumadamzat bähbitli işleriňizi elmydama rowaç etsin! Sizi çuňňur hormatlamak bilen, Türkmenistanyň ähli dindarlarynyň adyndan Türkmenistanyň müftüsi R.GURBANMYRADOW.

Arkadag şäheri, 5-nji oktýabr (TDH). Şu gün türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz milli binagärlik ýörelgeleri bilen häzirki zamanyň ösen tejribesiniň utgaşdyrylmagynda bina edilen Arkadag şäherine iş saparyny amala aşyrdy. Gahryman Arkadagymyz täze şäheriň gurluşygynyň ikinji tapgyrynda alnyp barylýan işler bilen tanyşdy hem-de degişli ýolbaşçylaryň gatnaşmagynda iş maslahatyny geçirdi. “Garaşsyz, baky Bitarap Türkmenistan — bedew batly at-myradyň mekany” ýylynyň häzirki pursatlarynda Milli Liderimiziň başlangyjy we yzygiderli tagallasy esasynda binýat bolan täze şäheriň gurluşygynyň ikinji tapgyrynda alnyp barylýan işler batly depginlerde dowam etdirilýär. Ýurdumyzyň gözel künjekleriniň birinde ýerleşýän Arkadag şäheriniň gurluşygynyň ikinji tapgyrynda önümçilik we medeni-durmuş maksatly binalaryň taslamalary häzirki döwrüň talabyna laýyk derejede alnyp barylýar. Bu bolsa täze şäheriň keşbiniň gün-günden gözelleşmegini üpjün edýär. …Ir bilen türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz häzirki döwrüň nusgalyk şäheri derejesine eýe bolan Arkadag şäherindäki Arkadagyň ruhy metjidiniň ýanyna geldi. Bu ýerde hajy Arkadagymyza metjidiň gurluşygynda we bezeginde ýerine ýetirilýän işler we gurluşykda ulanylýan serişdeleriň aýratynlyklary barada maglumat berdiler. Halk Maslahatynyň Başlygy bu ýerde alnyp barylýan işleriň depginleriniň yzygiderli ýokarlandyrylmagyny, gurluşyklaryň ýokary hil derejesinde ýerine ýetirilmegini we binalaryň bellenen möhletlerde ulanmaga tabşyrylmagyny üpjün etmek bilen baglanyşykly meseleleriň hemişe üns merkezinde saklanmalydygyny belledi. Aýratyn-da, metjidiň gurluşygynda alnyp barylýan işler ýokary halkara görkezijilere doly laýyk gelmelidir. Şeýle hem Gahryman Arkadagymyz bu ýerde Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi G.Mämmedowanyň gatnaşmagynda iş maslahatyny geçirdi. Onuň dowamynda täze şäheriň çäklerinde alnyp barylýan işleri ýokary derejede tamamlamak bilen baglanyşykly meseleler ara alnyp maslahatlaşyldy. D.Orazow Arkadag şäheriniň gurluşygynyň ikinji tapgyrynda alnyp barylýan işler, hususan-da, bu ýerde durmuş maksatly desgalaryň, şol sanda daşary ýurt dillerine ýöriteleşdirilen mekdebiň we çagalar bagynyň gurluşyklary, metjidiň bezeg işlerinde ulanylýan serişdeleriň aýratynlyklary barada giňişleýin maglumat berdi. Türkmenistanyň at gazanan arhitektory Gahryman Arkadagymyz täze şäheriň çäklerinde gurulýan ýaşaýyş jaýlarynda bolşy ýaly, durmuş maksatly binalarda ýerleşdiriljek sanlylaşdyrylan enjamlaryň hiline, döwrebaplygyna, berkligine we uzak möhletleýinligine zerur üns bermek babatda özüniň öwüt-ündewlerini berdi. Gahryman Arkadagymyz bu baradaky gürrüňi dowam edip, täze şäherde gurulýan, daşary ýurt dillerine ýöriteleşdirilen mekdebiň okuw otaglaryny enjamlaşdyrmak, synp otaglarynyň reňklerini sazlaşykly utgaşdyrmak, multimedialaşdyrmak, bilim ojagynyň okuw-usulyýet işlerini kämilleşdirmek babatda dünýäniň ösen tejribesiniň öwrenilmelidigini, aýratyn-da, bu ýerde okatmagyň täzeçil usullarynyň özleşdirilmelidigini nygtady. Şunuň bilen baglylykda, daşary ýurtly hyzmatdaşlar bilen gatnaşyklary yzygiderli ösdürmegiň we bu ugurda ylmyň täze gazananlaryny ulanmagyň wajypdygyna ünsi çekdi. Iş maslahatynyň dowamynda täze şäheriň lukmançylyk klasteriniň önümçilik toplumlarynyň gurluşyk işleri, olaryň üpjünçiliginde ulanylýan önüm öndüriji enjamlar, binalaryň bezeg işlerinde ulanylýan serişdeler hem-de önümçilik desgalarynyň ýanaşyk ýerlerini bagy-bossanlyga öwürmek boýunça meýilleşdirilen işler barada maglumat berildi. Şeýle hem bu ýerde Gahryman Arkadagymyzyň ozal beren maslahatlaryndan ugur alnyp, Arkadag şäheriniň sport toplumlarynda ýerine ýetirilen işler barada taýýarlanylan çyzgylar görkezildi. “Akylly” şäher konsepsiýasy esasynda bina edilen täze şäheriň özboluşly binagärlik aýratynlyklary, ýokary ekologiýa derejesi we ýaşaýyş jaýlarynyň mümkinçilikleri, şäheriň yşyklandyryş ulgamy döwrüň ösen talaplaryna mahsus derejede bolmalydyr. Bu bolsa şäher ilatynyň ýaşaýyş-durmuş derejesiniň ýokarlanmagy bilen baglanyşykly meseleleriň oňyn çözgüdiniň baş şertini emele getirýär. Türkmen halkynyň Milli Lideri täze şäheriň ikinji tapgyrynyň açylyş dabarasyna ýokary derejede taýýarlyk görülmelidigini belledi. Türkmenistanyň Halk Maslahatynyň nobatdaky mejlisinde hormatly Prezidentimiziň belleýşi ýaly, “akylly” şäher — Arkadag şäheri abadan hem bagtyýar durmuşymyzyň görkezijisi bolup durýar. Şonuň üçin şäheriň ikinji tapgyrynda gurulýan binalar hem halkymyzyň eşretli durmuşyny üpjün etmäge gönükdirilendir. Gahryman Arkadagymyz bu ýerde gurulýan lukmançylyk klasteriniň önümleriniň hiline möhüm ähmiýet berilmelidigini nygtady. Munuň özi ýurdumyzda saglygy goraýşa degişli önümleriň üpjünçiligini gowulandyrmak bilen bir hatarda, ykdysadyýetimiziň eksport mümkinçilikleriniň ýokarlanmagynda ähmiýetli bolar. Milli Liderimiziň başlangyjy bilen “Saglyk” Döwlet maksatnamasynyň kabul edilenine 30 ýyldan gowrak wagt geçdi. Bu döwürde milli saglygy goraýyş ulgamynda ägirt uly ösüşleriň gazanylandygyny, birnäçe keselleriň soňuna çykylandygyny bellemek gerek. Bu boýunça birnäçe halkara guramalar tarapyndan ýurdumyza güwänamalar gowşuryldy. Munuň özi ýurdumyzda saglyk edaralarynyň maddy-enjamlaýyn binýadynyň berkidilýändiginiň, lukmanlaryň hünär taýdan yzygiderli kämilleşdirilýändiginiň, saglygy goraýyş ulgamynyň ýokary derejä çykandygynyň aýdyň güwäsidir. Bu baradaky gürrüňi dowam edip, Gahryman Arkadagymyz soňky ýyllarda ýurdumyzda köp sanly çylşyrymly operasiýalaryň üstünlikli ýerine ýetirilýändigini belledi. Bu bolsa ýurdumyzda ynsan saglygyny goramak we keselleriň öňüni almak, şol sanda häzirki zamanyň ösen tejribesini we täzeçil tehnologiýalary, emeli aň mümkinçiliklerini özleşdirmek ugrunda zerur işleriň geçirilýändigini görkezýär. Iş maslahatynyň dowamynda Arkadag şäheriniň häkimi G.Mämmedowa häzirki döwürde täze şäheriň çäklerinde alnyp barylýan işleriň ýagdaýy, öňde boljak şanly seneler, şol sanda Saglygy goraýyş we derman senagaty işgärleriniň güni mynasybetli meýilleşdirilen çäreleriň, baýramçylyk günlerinde ildeşlerimiziň täze jaýlardan paýly bolmaklarynyň guramaçylyk ýagdaýy barada giňişleýin maglumat berdi. Halk Maslahatynyň Başlygy ýurdumyzda giňden bellenilýän saglygy goraýyş we derman senagaty işgärleriniň hünär baýramçylygynyň örän guramaçylykly geçirilmelidigini belledi. Şunuň bilen baglylykda, watandaşlarymyza täze jaýlaryň açarlaryny gowşurmak, şanly senäni giň gerim bilen dabaralandyrmak, saglyk merkezlerinde alnyp barylýan işleri kämilleşdirmek, keselleri anyklamak ugrunda zerur tagallalar edilmelidir. Milli Liderimiz keseli bejereniňden onuň öňüni almagyň ähmiýetiniň uludygy barada-da aýtdy. Çünki Türkmenistanda “Il saglygy — ýurt baýlygy” şygary ýörgünlidir. Türkmen topragynda saglygy goraýyş ulgamynda ähmiýetli hasaplanylýan tebigy serişdeleriň örän köpdügini belläp, lukman Arkadagymyz bu ugurda häzirki zaman tejribesini we emeli aň mümkinçiliklerini özleşdirmegiň hem-de netijeli peýdalanmagyň geljek nesilleriň bagtyýar durmuşynyň kepilidigini nygtady. Gahryman Arkadagymyz täze şäheriň töwereginde miweli baglaryň ösdürilip ýetişdirilýändigini, mundan beýläk-de bagçylygyň çägini giňeltmek, miweli baglaryň görnüşlerini artdyrmak meselelerine zerur üns bermek babatda öwüt-nesihatlaryny berdi. Şunda bu künjegiň toprak-howa şertlerine laýyk gelýän baglaryň ösdürilmegi, “Babarap almasy” adyny alan almanyň ýokumlylygy ýerli seçgiçileriň köpýyllyk tejribesiniň aýdyň netijesidir. Häzirki döwürde hajy Arkadagymyzyň başyny başlan asylly ýörelgeleriniň Arkadagly hajy Serdarymyzyň parasatly baştutanlygynda üstünlikli durmuşa geçirilmegi netijesinde, metjit gurmak, ýol çekmek, guýy gazmak ýaly sogap işleriň rowaçlanmagyna döwlet derejesinde ähmiýet berilýär. Şeýlelikde, «Allanyň öýi» hasaplanylýan we sogap işleriň berjaý bolýan ýerlerinde, aýratyn-da, metjitlerde ýagşy dilegler edilýär. Şunuň bilen baglylykda, Arkadagyň ruhy metjidinde belent maksatlary nazarlaýan we asyrlar aşyp gelýän sogap işlere giň orun berler. Soňra hajy Arkadagymyz 30 müň adama niýetlenen Arkadagyň ruhy metjidini we onuň ugurdaş desgalaryny hem-de olarda oturdylan gapylary synlady. Gahryman Arkadagymyz olaryň hil aýratynlygyna degişli ýolbaşçylaryň ünsüni çekdi. Mukaddes künjegiň bezeg serişdeleriniň talabalaýyk seçilip alynmagynyň wajypdygyna ünsi çekip, hajy Arkadagymyz binanyň daşky we içki bezeg işleriniň, onuň yşyklandyryş ulgamynyň yslam dünýäsinde ähmiýetli hasaplanylýan metjide mahsus derejede bolmalydygyny belledi. Soňra Gahryman Arkadagymyz metjidiň 1500 orunlyk sadaka jaýyna bardy we bu ýerde alnyp barylýan işleri synlady. Bu ýerde Arkadagyň ruhy metjidiniň